ოქსფორდის უნივერსიტეტის მკვლევარებმა გააანალიზეს ”ვიკიპედიაში” გეოგრაფიული შინაარსის სტატიები და მივიდნენ დასკვნამდე, რომ ევროპის ქვეყნები და აშშ ქმნიან რა მსოფლიოს სურათს, მხედველობაში არ იღებენ ღარიბ განვითარებად ქვეყნებს და მათ პოტენციალს. ამის შესახებ წერს გაზეთი The Guardian-ი. ენციკლოპედიის მთელი მასალის დაახლოებით 45%, რომელიც ეხება მსოფლიო რუკაზე გეოგრაფიულ პუნქტებსა და ღირშესანიშნაობებს, ძირითადად, მსოფლიოს მხოლოდ 5 ქვეყნის ავტორების მიერაა შექმნილი. ბრიტანელი მეცნიერების ვერსიით მსოფლიოს ”ვიკიპედიისათვის” აღწერენ ბრიტანელი, ამერიკიელი, ფრანგი, გერმანელი და იტალიელი ავტორები. გარდა ამისა, განვითარებადი ქვეყნების საკუთარი მოსახლეობაც ცდილობს ”ვიკიპედიაში” ისეთი ინფორმაცია დაამატოს, რომელიც ევროპის სახელმწიფოებსა და ჩრდილოეთ ამერიკას ეხება და არა მათ საკუთარ ქვეყანას, რაც კიდევ უფრო ზრდის გეოგრაფიულ დისბალანს.